ONTZIRATU ARRANTZA-ONTZI TRADIZIONAL BATEAN, MURGILDU AGURTZAN!
Agurtza atunontzia gure kostaldean arrantzatzen zuten egurrezko arrantza-ontzien adibide bikaina da. Agurtza 1968an eraiki zen Lekeitioko Murelaga ontzioletan, eta XX. mendearen bigarren erdian gainazaleko arrantzan aritu zen, bai Kantauriko kostaldean, bai urruneko itsasoetan.
Ontzia desegiteko zorian zegoenean eskuratu zuen Santurtzik, eta Arrantza Teknikariaren interpretazio zentro bihurtu zuen.
Agurtza atunontziaren inguruan, egurrezko tinglatu bat eraiki zen, duela hamarkada batzuetara Kantauri itsasoko kostaldean zeuden ibaiertzeko ontziola zaharrak gogorara ekartzeko.
Pieza bakarra
Gure kostaldean arrantza tradizionala egiten zuten egurrezko azken ontzietako bat da, eta Bizkaian bisita daitekeen bakarra.
Santurtzi eta itsasoa
Gure herria baxurako arrantzan gehien aritu diren Bizkaiko portuetako bat izan da. XX. mendearen hasiera arte jarduera honetan trainerua zen nagusi, baina laster lurrun- eta eztanda-motorrek eragindako itsasontziak erabiltzen hasi ziren haien ordez, zama handiagoa eramateaz gain, langile gutxiago behar zutelako. Ondoren motordun itsasontziek hartu zuten aurreko ontzien lana -hasieran zurezkoak eta gero burdinazkoak eurak-.
Goieneko maila jo zuenean, zurezko 50 bat ontzi zuen itsasoratzeko prest, bertan 200 bat langile zeudela. Gero motordun itsasontziek hartu zuten aurreko ontzi haien lana. Eta iraganeko lan horren garrantzia ezagutzeko eta horren berri ondorengo belaunaldiei emateko mantendu da Agurtza atunontzia.
Agurtza atunontzia bisita
Itsasontzi-museo eta arrantza-teknikaren interpretazio zentro bilakatu den horretan egiten diren bisita gidatuetan hegaluzea nola harrapatzen zen eta arraina nola mantentzen zen ikus dezakegu. Atunontzi hori Bizkaian dagoen bakarra da.
Era berean, bestelakoak ezagutarazten dira: arrantzaleen bizitzaren alderdi nagusiak zeintzuk ziren, txo edo itsasmutilek (ontzietan lan egiten zuten umeek) zeintzuk lan burutzen zituzten, makinisten lan gogorra. Gainera, patroiak ontzia zuzentzen zuen aginte-zubia bisitatzen da. Baina ezin dugu emakumeen lana ahaztu; izan ere, lehorrean arraina saltzeaz eta merkaturatzeaz, sareak konpontzeaz, egunean bertan deskargatzeaz eta beste lan batzuk egiteaz arduratzen ziren.
Abrako begiratokia, Bilboko badia
Agurtza itsasontzia Santurtziko arrantza-portutik Bizkaiko zubirako bidearen erdian dago, itsas pasealekuan, kokaleku pribilegiatu batean, Abrako badiaren ikuspegi onenez gozatu ahal izateko.
Nahierara egindako bisitak ingurune seguru batean
Bisita erregularrak eskaintzen ditugu hainbat hizkuntzatan: euskara, gaztelania, ingelesa, frantsesa; bai eta taldeentzako bisita egokituak ere.
Antzeztutako bisitak zenbaitetan antolatzen ditugu.
Familiei zuzendutako bisitetan, itsasontziaren maketa eraikitzeko joko bat eskaintzen dugu.
Bisitak egiteko taldeak gutxienez 2 pertsonek osatuko dituzte, eta parte-hartzaile kopurua mugatzen dugu, esperientzia hobea bizi ahal izateko.
Ingurune segurua
Arrantza-teknikaren interpretazio-zentroak – Agurtza Itsasontzi Museoa – kanpo-ebaluazio neketsua egin du, neurri egokienak hartzeko eta zerbitzu segurua eskaintzeko protokolo bat duela egiaztatzeko.
“SICTED-Destino Seguro” zigilua lortu du, Turismoko Estatu Idazkaritzak eta Basquetourrek (Turismoaren Euskal Agentzia) bultzatuta.
Agurtza atunontzia industria-ondarearen Europako ibilbidean
Arrantza- eta industria-jarduerak Santurtziko paisaia eta bertako jendea sortu ditu.
Agurtza itsasontziak Santurtziko arrantzaren garrantzia adierazten du, XX. mendearen erdialdean Kantauri itsasoko arrantza-porturik aktiboenetako bat baitzen. Santurtzin eta euskal kostaldeko portuetan arrantzatzen zuten arrantza-ontzi tradizionalen eredua da.
Bisitaldietan 2 arrantza-teknika irakasten dira: inguraketa-arrantzako teknika, beita bizia harrapatzeko funtsezkoa, hegaluzearen kanabera-arrantzan erabiltzen dena.
Gainera, emakumeek portuan bertan egiten zituzten lanak azaltzen dira, hala nola sareak konpontzea, arraina deskargatu eta garbitzea edo saldu eta merkaturatzea.
Agurtza Ontzi Museoa Euskadiko turismo industrialaren sarearen barruan dago, eta Euskal Herriko iragana eta historia hobeto ezagutzeko aukera ematen du.
Industria ONDAREAREN EUROPAKO IBILBIDEAN dago.
Era berean, EUSKAL KOSTAKO MUSEO SAREKO kide da.
